Mundartkolumne: Saarmòò Bladd schwäddse in Brassielje!
Muss der Kerl danne allewei Bladd schwäddse, kann der kä Hoochdeidsch?! So ebbes hann isch schunn äfdergeheerd.
Dòòdebei verschdehn mansche Leid äänfach nidd, dass mer Bladd eischendlisch schunn vill länger schwäddsd als wie Hoochdeidsch. Erschd isses Bladd gewään unn danne hadd mer so gans dussma es Hoochdeidsch erfunn. Sellemòòls hannse gedenggd, dass ball all Leid nuur meh Hoochdeidsch schwäddse gääde. Awwer es Bladd iss nidd unnergang, glaabs nidd! Meh wie 100 Jòhr browwiere die Schuulmeischder, de Kinner nuur noch Hoochdeidsch beidsebringe. Fier die Kadds! Es Bladd gebbds immer noch! Unn warrum? Gans äänfach: Weil die Leid äänem ebbes middem Bladd vergliggere känne, was mer Hoochdeidsch nidd graad so gudd saan kann. Das gehd ääm äänfach besser vun der Dsung. Im Saarland iss Bladd so e gans schbedsjell Sach: Dò gebbds dswei Schbròòche, es Moosel- unn es Rheinfränggische. Droddsdemm grien die kä Grach midnanner. Die Schbròòche sinn jò vill älder als wie all die bolliddische Grense: In Loddringe schwäddsd mer es Saarbrigger Bladd unn das aach bis uff de Hunsbuggel unn weider.
Leddschd hann isch e Fraa gedroff, die iss aus Brassielje kumm. Was soll isch der saan: Die hadd Hunsrigger Bladd geschwäddsd unn gesaad, in Brassielje gääde heid noch meh wie drei Miljoone Leid Bladd schwäddse. Das sinn die Uuruurenggel vun de Auswannerer, die heid in Brassielje lääwe unn als Mudderschbròòch Bladd babbele. Mer kanns faschd nidd glaawe: Dò kinnschde nò Pordo Alleegre fliesche unn dord schwäddse wie dehemm. Es iss jò schunn glòòr, wann dord die Kinner schdadd Pordegiesisch erschd mò es Hunsrigger Bladd lehre – dsehndausend Killemeedre wegg vun hie. Derweil hann die Broffessoore rausgefunn, dass – wo Kinner Bladd unn Hoochdeidsch schwäddse – die Kinner schlauer wääre, ääwe weil se so ebbes hingrien: Dswei Schbròòche unn genau wisse, wann se welli Schbròòch schwäddse.
Fier misch isses Bladd so e bissje Geheischnis. Isch saan aach: Es iss so e Seele-Schbròòch im Saarland. Isch hann das mò innem Gedischd geschrieb: „Hoochdeidsch kummd ausem Kobb, awwer Bladd kummd ausem Herdsje!“
Georg Fox schreibt in rheinfränkischer Mundart. Infos über seine Arbeit gibt es unter www.nachtgedanken-saarland.de.
