Mundart-Kolumne Awwei werd’s Zeit
Günther Hussong hat nicht das Gefühl, dass seine Zeit schon vorbei ist. Er philosophiert darüber, was man alles mit seiner Zeit anfangen kann – und warum sie relativ ist.
Oft saan Leit, wo grad so om die Värrzisch sinn: „Das war mei Zeit“ unn menne die neinzischer Johre. Iss ma dann älder, werd die Auswahl viel greeßer. Ich muss vun Johr zu Johr länger iwwerleje, was eischentlich „mei Zeit“ war, unn finne kenn Antwort. Ich hann aa net ’s Gefiehl, dass mei Zeit schun erom iss. Gut, met manchem moderne Zeisch kommt ma halt nimmie so met, awwer so geht’s junge Leit aa met vielem. Unn sogar die, wo immer met de Zeit gehn, gehn met de Zeit emoo.
Mei Zeit iss mei Eischetum; ich kann iwwer se vefiesche – wann se ma net grad vun Daachdiewe geklaut woor iss. Awwer wann ich gefroot werre, ob ich Zeit hätt, saan ich trotzdem oft dabber nee – ich misst mich dummele. Doodebei hätt ich massisch Zeit, will odder muss die awwer fa ebbes anneres nutze, se eenfach veplempere odder sogar dodschlaan. Unn wann ich zu viel Zeit hann, vegess ich die Zeit unn hann dann gar kenn meh.
Ma kann annere Leit „die Zeit biete“, also grieße. Am schenschde isses, jemand Zeit se schenke. Zeit fa Kranke unn Schwache, Alde unn Kinner, Zeit fa die, wo alleen sinn, wo die Flemm hann; Zeit, fa met denne se schwätze oder ne eenfach zusehorche. Wie groß iss die Frääd, wo sich met de Zeit zeit, wann emm ebbes an Leit leit!
Zeit iss relativ, das wisse ma vum Einstein. Der war seiner Zeit voraus, awwer sei Theorie hätt ich net gebraucht, fa de Unnerschied zwischerer Stunn Worzelbehandlung beim Zahnarzt unnerer Stunn Sportschau se merke. Unn wann deheem mei Fraa saat: „In zeh Minute bin ich ferdisch“, bin ICH noorer Stunn ferdisch, well Meins immer noch net ferdisch iss. Saan ich awwer moo: „Ich rebbareere das sofort“, duut ääs mich jed halb Johr dran erinnere, ich hätt’s immer noch net erledischt.
Zeit dääle Mensche schun seit Johr unn Daa in Stunne unn Minudde in. Wie de Gregorianisch Kalenner ingefehrt woor iss, hat sich ’s Datum om elf Daa verschob. Doo reesche meer uns uff, dass ma zwäämoo im Johr die Uhr eenie Stunn omstelle misse. Ich bin joo net immer sicher: werd se vorgestellt odder serickgedreht? Bei manche Politiker wisst ich schneller, was ma liewer wär: „vorgestellt odder serickgetret“.
Wie relativ Zeit iss, merk ich vor allem, wann mei Fraa zu ma saat: „Awwei werd’s Zeit!“ Dann isses nämlich schun lang heegschdie Zeit unn ich hann bestimmt in de nächscht Zeit kenn Zeit meh.
Günther Hussong, Vertreter der rheinfränkischen Mundart, wohnt in Kirkel-Neuhäusel.
