Aangefang hadd alles, wies Roosi dsu seim Mann gesaad hadd, dasses jeddse ääner breischd, woo em bissje helfd. Dò hadd Seiner, gesaad, se kännd jò mò die Nochbersch fròòe, unn die breischd das jò aach nidd fier niggs se mache. Es Roosi waar jò schunn immer e bissje schnäägisch gewään unn hadd nidd so rischdisch gedsòò, awwer wie danne de groos Hausbudds kumm iss, dò haddse die Nochbersch danne doch gefròòd. Die hadd gleisch jòò gesaad unn dass se missd minneschens vier Labbe hann unn danne aach noch drei Äämer dedsuu. "Dunnerliddsche!" hadds Roosi gedenggd, "mid däär hannisch die Goldkaard gedsòò." Unn dòò hadds gesaad: "Ei sie wisse mò wirglisch, was buddse heischd, kummese danne mò näggschde Middwuch, dò fange mier rischdisch aan." Es Roosi iss de Daach devòòr dabber in de Baumaargd gang unn hadd dswälf Buddslumbe kaaf unn aach noch e gans Baddrie vun Äämere, dass die aarm Fraa aach sefridde solld sinn. Awwer wie die danne aanfange wolld, haddse gesaad, die Labbe wääre dse groos unn se breischd dsem Buddse gläänere Labbe, so gans glääne Läbbscher. Unn dòò iss es Roosi widder loss, fier dass es die Läbbscher besorschd hadd, derweil die Nochbersch mò Kaffeepaus gemachd unn aach e Breedsche mid Lewwerwurschd verdriggd hadd. Wies Roosi danne kumme iss, hadd die Nochbersch gesaad, es Roosi missder mò dseie, wies gebuddsd wolld hann unn woo, unn was iwwerhaubd so se mache wäär. Unn es Roosi iss uff die Lääder geschdie unn hadd der Nochbersch gedseid, wie die Egge gebuddsd genn. Unn danne hadds Roosi vòòrgemachd, wie die Finschdere gebuddsd genn, unn danne hadds Roosi gedseid, wie de Boddem geschrubbd gebbd, unn die Nochbersch hadd debei geschdann unn hadd gesaad, dass se das aach so gemachd hädd, unn se gääd aach noch de annere Labbe holle, dass se mò dseie kännd, wie die Kisch abgewäsch gebbd. Unn es Roosi hadd sisch ins Dseisch geleed, weil die Nochbersch so rischdisch begeischderd waar, wies Roosi die Aarwed geschaffd hadd. Nòò dswei Schdunne waar die gans Wohnung bliddseblangg, es Roosi waar figgs unn ferdisch unn die Nochbersch hadd gesaad, ei se wäär jò bladd, wie schnell se die Wohnung uff Vordermann gebrung hädde unn wie alles so scheen sauwer wäär. Dò hadd se die Hann uffgehall fier dreisisch Eiro fiers Buddse unn die näggschd Wuch gäädse nommò kumme unn danne kännde se das widder so mache. Unn es Roosi solld schummò die Läbbscher unn Labbe auswäsche unn veleischd aach die Äämer ausschidde unn gudd auswäsche, weil se die näägschd Wuch nidd middem dreggische Äämer buddse gääd. Bis näggschmò kännd se jò schummò die Terrass feesche unn veleischd die Bedder schdribbe, weil se hädd gesiehn, dasses needisch hädde. Wie em Roosi Seiner schbääder erfahr hadd, wie alles gelaaf iss, hadder nuur noch die Nochbersch gebuddsd. Dòò waar danne segaar die Lufd noch sauwer. Georg Fox lebt in Püttlingen. Am 8. Oktober liest er um 19 Uhr im Jagdschloss von Karlsbrunn aus seinen Büchern.