In der leddschd Zeit heerd mer joo imer effder, dasse sich fier knifflische Probleme Berater angaschiere. Berater, das sinn so iwwerkwalifizierde unn begehrde Zeitgenosse, dass mer sich garnidd traut fier das uff Platt se schreiwe. Das iss sosesaan e besunneri Art vunn Experde. Awwer während de Experde ins Fernsehn kummt, kummt de Beraader geeje entspechende Bezahlung direggd ins Haus. Wann bei uns nämlich jemand in e Amt gewählt werrd, doo kried der seerschd mool e Schregg. Wer wääs ob ich vunn der Sach aach genuch Ahnung hann, saader sich selbschdkriddisch. Unn dann heuert er sicherheitshalwer e Berater aan. Der wo ihm dann saad woos längs geht.Awwer aach fier de klääne Mann gebbds so niddsliche Helfer, wie zum Beispiel de Stauberater. Der trääd dann in Akzioon, wann die Karawane de viertelse Urlaub uff der Audobahn abstoddere duud. De näägschde Verwande vum Stau iss joo die Stroosesperr, die wo aach meischd in der Urlaubszeit inngericht werrd. Weil dann die Leid, wo sich gewohnheitsmääsisch beschwääre all auswärts sinn unn dort iwwers Esse meggere. Odder es iss graad die Zeit, wo de chinesiche Verkehrsminischder, de Genosse Um-Lei-Tung, turnusmääsisch uff Besuch kummt. In Dengmerd hannse sich nämlich in de leddschde Wuche an de Spruch vum Konfuzius gehall: Die kerzeschde Verbindung zwische zwää Punkte iss de Umwää.

In de Verkehrmeldunge saan se joo immer so scheen plasdisch: mer sollt die Sperrung großräumisch umfahre. Doodebei zeid awwer die deitsch Sproch widder ihr Tügge: mer muss schwäär uffpasse, uff weller Silbe mer das Wort betone duud. Es iss nämlich e grooser Unnerschied ob ich e Verkehrshindernis umfàhre duun odder ob ichs äänfach ùmfahre.