Die leddschd Wuch hannse hie in der Zeidung es äldeschde Bischeleise in unserer Geeschend vorgestellt. Wie ich dann gelääs hann, dass das im Kampf geeje Falte ingeseddsd worr is, doo hann ich seerschd gemennd, dass wär so e Fall vunn Brachial-Kosmedigg. Weil mer joo aach als midd schwäärem Gerät an die Verscheenerung vum äusere Erscheinungsbild draangeht. Noo dem Moddo: Wer scheen sinn will, muss leide. Unn in denne bleede alde Widdse iss das Ding aach oft - sesamme middem Waffeleise, der Broodpann unn em Schierhooge - als Argumentationshilfe im innerfamiliäre Disput uffgetaucht. Awwer heit sinn joo bekanntlich die Zeide wesentlich friedlicher. Unn ich hann dann als Schnellmerker aach sofort bekebbd, dass doo nidd die Falte im Gesicht gemennd ware, sondern eejer die in de Klääder. Midd frisch gebischelde Hemde odder Bliesjer macht mer nämlich in der Gesellschaft direggd e besserer Indrugg, als wie wammer verkrummbeld erumlaafd. Unn wann änner dann noch geberscht unn gestrählt iss, doo kammer ne beruhischt uff die Menschhääd loslosse. Mer schwäddsd joo aach devunn, wann änner ebbes ausgefress hadd, dass das hinnerher widder ausgebischeld werre muss. Meischd vunn de annere. Annererseits hadd awwer jemand, wo morjens schunn ziemlich verknautscht uffwache duud, noch de ganze Daach Zeit fier sich se entfalte. Interessanderweis sinn awwer Bischelfalte an der Bux e Zeiche doodefier dass mer besunnerschd schnadds aangezoh iss. Wobei mer das Korreggde in der Owwerbekleidung heid gar nimmeh so hadd. Doo sinn graad die deierschde Buxe extra kunschdvoll verknidderd. Ganz chic isses, wann aach noch Lecher drin sinn. So iss halt die Mode - leicht unn doch leger.