Ich wääs joo nidd, ob ich mich täusche, awwer in leddschder Zeit hann ich das Gefiehl, dass immer effder um mich erumm gesung odder gepiff werrd. Ich menn jedds nidd die Veschel, wo joo berufsmääsisch unn als schunn friehmorjens in der Naachd tirilliere. Wahrscheins iss das weeje dem Wonnemoonaad, was einische Zeidgenosse die Tonläädere enufftreibt. Odder es iss im Geejedäl de Galgehumoor in Kriesezeide. So wie mer bekanndlich aach im dungele Keller peife duud, wammer Fracksause hadd. Was joo spontaanene musikalische Darbiedunge besunnerschd aanreeche duud, iss e fliesendes Gewässer. Wann de Männergesangverein zum Beispiel in Rüdesheim am Ufer steht, unn sich in C-Dur frood, warums am Rhein so scheen iss. Manche duun sich sogar midd Singing in the Rään Stimmung bringe, was awwer e tüppischer Fall iss, wie mer sich selwer froh macht. Gäre gesung werrd aach in der Baadewann, weil mer doo nidd vill Schaade aanrichde kann. Unn neilich bin ich sogar in de Umkleidekabine vun unserm Schwimmbad in de Genuss vun aangewander Sangeskunscht kumm. Uff der än Seid hadd äner vor sich hin gebrummt: Rosamunde, schenk mir dei Spaarkassebuch. Unn uff der anner hadd äner die Brücke am Kwai gepiff. Wobei ich garnidd wääs, ob das uff hochdeitsch jetzt häsche missd: er pfeifte odder er pfoff. Iwwerhaupt muss mer doo joo schwär uffpasse. Vor Johre iss nämlich so e Fall durch die Presse gang, doo hadd äner ausgerechend im Minischderium uffem Flur die Internazionaale gepiff. Und das hadd ihne de Dschobb koscht. Weil e liewer Kolleesch ne verrood hadd. Doo frood mer sich allerdings, wann das so e schlimmes Lied war, wieso der das nur vum Peife iwwerhaupt gekennt hadd.