Ab kommende Samschdaach werrd uns uff der Tuurischtigg-Mess widder die Naas lang gemacht. Doo moole se uns in blühendschde Faarwe aus, was es in der Geografie iwwerall fier scheene Fleggcher gebbd. Wo mer noch nidd war, awwer unbedingt mool hin missd. Doo fallt mir uff, dass mer uff der ään Seit vunn Reise-Luscht schwäddsd, awwer annererseits aach vum Fern-Weh. Vielleicht weil mer vun denne Fernziele traurischerweis nidd immer nur paradiesisches heert unn lääst. Es Geejestigg doodezu iss dann es Hemm-Weh odder uff saarlännisch die exodisch Flemm. Desweeje guggd mer sich joo aach neiderdings verstärkt in der nääjere Umgeewung um. Ganz owwe uff der Hitlischt stehn jedds im Friehjohr die Fahrte ins Griene odder ins Blaue, vor allem awwer meeschlichst ins Warme. Sogar mei Freind Schorsch, wo normalerweis sei Hinnere nidd hochkried, hadd neilich gesaad, er hädd dringend e Tabeedewechsel needisch. Doo hann isch noch gefrozzelt, er bräucht joo nur die langweilische gestreifde geeje karierde aussetausche. Gligglicherweis gebbds jedds e neijer Fernsehsender, wo genau fier so Leid ideal iss. Doo kammer dehemm im Sessel im Trainingsanzuuch huggebleiwe unn sich gleichzeidisch am Bildschirm aangugge, wie ääner midd der Kamera stunnelang im Saarland erummfahrt. Unn mer sieht joo doodebei aach unheimlich uffreeschende Sache: Kilomeederlange Landstroose, gemiedliche Staus vor Ampele unn richdisch runde Kreisel midd echde Audos. Es iss faschd so wie friejer, wo die Rentner de ganze Daa am Fenschder gelääh hann. Nur gebbds nadierlich Leid, wo das nidd so gääre hann, wannse so beobachtet genn. Am beschde fahrt mer dann doch e bissje wieder weg, wo emm kääner kennt.