Im Dengmerder Stadtarchiv mache die inngelaacherde Wertsache Huddel. De geweenliche Laie mennd joo, bei denne Doggumende unn Akkde doo unne kinnd nix passiere. Weil die sich joo soosesaan im Zuschdand ständischer Friejohrmiedischkääd befinne. Unn ganz friedlich vor sich hin schlummere. Awwer das teischt: weil in so Babiere agressive Säure drinn iss, duun die sich langsam awwer sicher uffleese. Unn vunn Wohlgefalle kann in soome Fall iwwerhaupt kää Redd sinn, wie ihne jeder Archivar beschdäädische wird. Unn dann kummd hie in Dengmerd aach noch erschwerend dezu, dass es Archiv ball aus de Näähd pladdse duud. Awwer dass joo eichendlich aach logisch: Je meh die Geschicht vun der Stadt sich zeitlich weider entwiggeld, umso meh duud sich aus de verschiedene Epoche ansammele an Unnerlaache unn Relikte. Wo mer gääre hädd, dass die aach unser Enkel mool noch se siehn kriehn. Awwer während die Zeit als weider laafd, notfalls aach bis ins Unendliche, doo bleibt de Raum, besunnerschd, wanner im Sutteräng unnergebrung iss, immer gleichbleiwend eng unn beschränkt. Mir falld graad uff, dass ich bei dem Thema widder mool so filosofische Aanwandlunge krien. Wahrscheins, weil vunn Sache, wo e bissje Patina aangeseddsd hann, immer ebbes leicht Melangkooolisches ausgeht. Gudd, nidd vun allem: die Nääzrelljer vun vorm Kriech unn die ausrangschierde Fondü-Dibbcher, wo uffem Speicher vergammele,die hädd mer besser ausrangschierd. Awwer das iss beime Archiv joo kää Leesung. Ganz im Geejedääl. Mer missd das Material dabber imme elektroonische Speicher unnerbringe. Fier denne Fall, dasses Originaal irjendwann mool nimmeh se entziffere iss.