Es Wunner vum Wasser in Wein

Das waar dòòmòòls gewään, gleisch nòòm Griesch, wie die Kinner noch nidd so glewwer gewään sinn wie heid. Isch waar so e Gnägges vun drei odder vier Jòhr gewään unn mei Bruuder waar schunn in der Schuul unn hadd immer e bissje meh gewissd wie isch. Im Rellischjoonsunnerrischd hann die dòòmòòls die Geschischd vun der Verwandlung vum Wasser in de Wein gelehrd

Das waar dòòmòòls gewään, gleisch nòòm Griesch, wie die Kinner noch nidd so glewwer gewään sinn wie heid. Isch waar so e Gnägges vun drei odder vier Jòhr gewään unn mei Bruuder waar schunn in der Schuul unn hadd immer e bissje meh gewissd wie isch. Im Rellischjoonsunnerrischd hann die dòòmòòls die Geschischd vun der Verwandlung vum Wasser in de Wein gelehrd. Das hadd awwer mei Bruuder nidd wolle glaawe, wie dòò de Herr Jeeses ausem Wasser de Wein gemach hadd. Unn weil mei Vadder unn mei Mudder fromm waare, hann se gedenggd, dass das nidd gehn kännd, wann e Kind nidd glaabd, was in der Biebel uffgeschrieb genn iss. Dò hadd mei Vadder all Kinner die Wandlung vum Wasser in de Wein mò rischdisch demmenschdriere wolle.Jeede Sunndaa, wann mier dsem Middachesse sesamme gehuggd hann, hadd mei Vadder allgebodd fier die Mudder unn fier sisch e Glääsje Wein ausgeschudd. Danne hann die Kinner gemäänerhann bei uns e Glääsje Gänsewein gridd, dasse aach ebbes im Glaas gehadd hann. Das waar immer gans gewehnlisches Schbruudelwasser gewään. Denne Sunndaa awwer waar mei Vadder vòòrhäär häämlisch hingang unn hadd in die Schbruudelflasch, wo de Schbruudel ohne Geschmagg drin gewään iss, Dsiddrooneschbruudel ringeschudd. Dò hadd mer danne schun beim erschde Schlugg gemergd, dasses dissmòò nidd nuur Schbruudelwasser gewään iss, was mier dò dringge. Das hadd jò rischdisch e sieser Geschmagg gehadd. Mei Vadder hadd sisch niggs aanmerge gelass, hadd danne aach de Gänsewein browwierd unn hadd gesaad, dass de Wein e bissje sies schmeggd, awwer nidd schleschd, das missd wohl Dsiddroonewein sinn, wo dò jeddse ausem Schbruudel genn iss, weil mier vòòr em Esse gudd gebääd hädde. Dò hädd de Herr Jeeses mò gedenggd, es wäär mò widder aan der Dseid, e Wunner se wirge. Unn mier hann de Dsiddroonewein all mid Aandachd gedrungg, weil mier gedenggd hann, dass de Herrgodd näggdschd unner uns wäär, was jò - wann mers rischdisch holld - aa so gewään sinn muss, weil mei Babbe gesaad hadd, dass de Herr Jeeses kummd, wann dswei odder drei sesamme kumme, danne wäär er middemang debei.

Mier hann iwwerall im Dorf verdsähld, dass bei uns e Wunner bassierd wäär, unn de Herr Baschdoor hadds nidd wolle glaawe. Er hadd dse meim Bruuder gesaad, er solld kää so dumm Dseisch verdsähle unn wanner nommòò devun aanfange dääd, dirfd er nidd dser Kommenjoon gehn. Mei Bruuder hadd em awwer dann schbääder die gans Sach hemmgedsahld, wierer nòò der Kommenjoon Messdiener genn iss. Der hadd de Messwein ausgedrungg unn hadd danne in das Fläschelsche vum Messwein Weihwasser ningemach. Unn dòò hadd de Herr Baschdoor in der Mess de Kelsch graad so gedrungg, wie wenn das wirglisch Wein wäär. Naddierlisch kännds awwer sinn, dass daadsäschlisch graad nommò so e Wunner bassierd iss, unn de Herr Baschdoor hadds aach dissmòò gaanidd midgridd, wääs mers? Isch hann dòòmòòls nuur gedenggd: "Das hadder ääwe gehadd - vun seim Unglaawe! E Wunner bassierd, unn nuur de Herr Baschdoor gridds nidd mid!

Georg Fox lebt in Köllerbach. Er liest am 26. August um 19.30 Uhr im Rahmen der Literatissimo-Reihe zusammen mit Margret Roeckner im Haus Waldkauz, Bildchenstraße, Püttlingen-Ritterstraße.

Meistgelesen
Neueste Artikel
Zum Thema
Aus dem Ressort