Wanner denne vertrauenserweggende Ausdrugg Ent-Sorgung heert, doo macht sich beim gemeine Gebiehrezahler normalerweise e wohlisches Gefiehl breit. So guddersprech er breicht sich um das Problem kää Kummer meh se mache. Midd was de gleichnamische Verband allerdings die Dengmerder ab näägschd Johr begligge will, dass leid denne jedds schunn tonneschwäär im Maache. Weil doo e vollkommen neijes Sischdeem inngefiert werrd, wo kääner so genau wääs, was doodebei hinnerher eichendlich rauskummt. Noch nidd emool unser Stadtowwerhaupt, wo joo sunschd e kombetender Aansprechpartner in alle Lääwenslaache iss. Awwer diesmool war er joo nidd debei. In der Broschiere, wo se verschiggt hann, fier de Leid das ganze se vergliggere, hannse joo schwäär Reklame gemacht fier das neije Konzebbd. Awwer wie doo uff dem Titelblatt midd Ausrufezeiche ganz groß gestann hadd: Keine Werbung, doo hann ich doch misse leicht schmunzele. Ich menn, dass mer Abfall inspare soll, das duud joo jedem verninfdische Mensch innleichde. Desweeje verstehn ich aach nidd, wieso doo beim Biomüll vumme Johresmindestgewicht vunn 376 Kilo die Redd iss. Also wie ich jede Daach ään Kilo Bioabfall produziere soll, das wääs ich noch nidd so genau. Awwer wann ich mich aanstrenge, wer wääs. Was sich aach ännere soll iss, dass de Sperr-Müll in Zukunft ebbes koschde soll. Doodefier kammer awwer demnäägschd aach e Müll-Sperre käuflich erwerbe odder seminneschdens miede. Weil joo bei dem Verfahre nidd nur es Vertraue in die Obrischkääd leide duud, sondern aach das in die umlieschende Middbewohner. Awwer sie hann das sicher nur gudd gemennt: wie macht mer aus Hausbesiddser ganz elegant Schlossbesiddser.