Ach du mei liewer Himmel, in vier Wuche iss joo schunn Weihnachde. Mer mennd als graad, se hädde em Kalenner zum Enn vum Johr aach so e Beschleunischungsgesedds verordnet. Awwer ich finne, die Zeit vor unn um Weihnachde iss joo trotz all der Heggdigg e wunnerbari Zeit. Auser fier die, wo nimmee an Wunner glaawe, die berufsmääsische Skebbdigger. Die wo wisse, wie de Haas laafd unn wo die Nachdigalle tabbse heere. Allerdings iss nadierlich aach die allgemeine Laache so, dass nidd bloos die Kinner zur Zeit ganz groose, erstaunde Aue mache. Aach die Erwachsene kumme ball ausem Staune nimmeh eraus. Ich wunnere mich joo es meischde doodriwwer, dass ich mich jeed Johr widder wunnere, wie schnell es alde erumgang iss. Odder dass kurz vorm erschde Adwent ganz iwweraschend pleddslich Schnee vum Himmel falle duud middsamt de Temberaduure. Wo se doch die ganz Zeit vun der globale Erwärmung schwärme unn dass mir ball Heimaturlaub unner Palme mache kinnde. Unn drei Daach später heerd unn lääst mer dann vumme annere Klimafachmann, mir missde uns in de näägschde Johre uff e klääni Eiszeit gefasst mache. Mir wunnere uns awwer aach, dass uff äämool iwwerall die Gebiehre unn Abgaawe steije. Obwohl mir doch genau wisse, dass in de leddschde Johre die effendliche Hand uff zu groosem Fuus gelääbt hadd. Noodemm dass mer doo nämlich die hohe Kunschd der Freigiebischkääd kulldiwiert hadd, will mer jedds Nehmerqualitääde unner Beweis stelle. Unn wann ich dann im Fernsehn heere, dass mich ääner annschwäddsd midd: Liebe Mitbürger, doo zugg ich unwillkirlich sesamme. Weil ich mich partout nimmeh doodraan erinnere kann, wann ich so e Bürgschaft unnerschrieb hann solld.