Jedds hadd sich de Petrus im Mai doch noch erweiche geloss. Unn Pingschde war mool werklich das liebliche Fest, so wies de alde Goethe schunn treffend beschrieb gehadd hadd. Mer hadd sich aach nimmeh iwwers Wedder misse de Mund fusselisch schwäddse, ohne dasses ebbes geholf hädd. Mer hadd sich äänfach kinne draan freije. Unn ins Freije sinn se dann joo aach schaareweis uffgebroch. Sogar es Dengmerder Freibaad iss ausem Winderschloof uffgewacht. Vill friejer hädd das nadierlich aach kää Zwegg gehadd, weil mer sich doo bei der kald Sofie nix geholl hädd wie Eisbään, blaue Libbe unn e durchwachseni Fregg. Mich werrd mool inderessiere, wies denne annere Schwimmbäder ergang iss, wo schunn am erschde Mai die Sääsong aangefang hann. Na ja, Wasser soll joo schwäär gesund sinn. Mer lääsd awwer neijerdings ziemlich vill iwwer Schadstoffe wo doo drin wäre, sogar vunn Uran is die Redd. Unn dass mer nidd pleddslich aanfangt fier im Dunkle se leuchte, doo duun die Leid das liewer in desinfizierder Form, also hochprozendisch zu sich nemme. Awwer wammer Wasser ause aan sich draan lossd, kammer an sich nix falsch mache. Saan die Kneippianer. Unn wemms im Freibad noch se kiehl im Schadde iss, der kann sich joo beim Wasserträäde in de needische Schwung bringe. Allerdings iss die Aanlach in Schiere, wo im Summer immer gääre die Vene-Polonaise absolwierd werrd zur Zeit noch e ziemlichi Baustell. Am Glashidder Weiher in Rohrbach, doo sinn se midd de Bauarweide schunn ferdisch. Doo hadd nämlich e anonüümer Sponsor bei Naacht un Newwel dem Träädbegge e monumendaaler Rahme aus Waggese verpasst. Wahrscheins hadd der fier sei Aktion de Decknoome Begge-Bauer beniddsd.