Es iss joo schunn inderessant, was die Forscher bei Forsche alles erausfinne. Dass mir zum Beispiel bei perseenliche Entscheidunge nidd unbedingt immer uff unser Verstand heere. Awwer das iss joo aach verständlich: mir duun unser Hirn im Alltagsstress so strabbaziere, dass das irjendwann aanfangt se kwalme. Mer saad joo aach: Das doo halschde doch im Kobb nidd aus! Unn in soome Fall, so behaupte die Pschüscholooche, doo soll mer sich dann aushilfsweis an sei Gefiehle halle. Mer hadd joo effder so e komisches Gefiehl im Bauch unn denkt sich, doo loss ich mool besser die Finger devunn. So e Art Warnsüschteem. Awwer komischerweis iss das beim Esse graad umgekehrt. Die Geschmaggsnerve hugge eewe nidd im Kobb, die hugge im Bauch unn desweeje reagiert mer bei der Nahrungszufuhr nidd immer verninfdisch.Doo iwwerkummt emm manchmool e Heißhunger, e Gammer noo Sache, vor denne wo uns unser Erziejungsberechdischde meischt gewarnt hann. Besunnerschd, wammer sich dann mengemääsisch schunn mool in der Dosierung verschätzt. Jedds im Summer steht joo widder es Eis ganz owwe uffem Speiseplan, wessweeje das joo aach Speiseeis hääscht.