Die Rache vum Doodegrääwer

E firschderlischer Schrei!! "Glaudjuss, Glaudjuss!" Immer widder. So hadd de glään Glaudjuss sei Ooma Oktavia noch nie geheerd schreie. Jesses! Dò muss ebbes aarisch Schlimmes bassierd sinn. Dabber laafd er ins Haus. "Ooma, Ooma, was haschde dann soo geschrie?" "Mei Au! Es iss mer ebbes ins Au geflòò

E firschderlischer Schrei!! "Glaudjuss, Glaudjuss!" Immer widder. So hadd de glään Glaudjuss sei Ooma Oktavia noch nie geheerd schreie. Jesses! Dò muss ebbes aarisch Schlimmes bassierd sinn. Dabber laafd er ins Haus. "Ooma, Ooma, was haschde dann soo geschrie?" "Mei Au! Es iss mer ebbes ins Au geflòò. Das brennd wie de Deiwel!" Ach jesses! Däär Glään iss gans verdswadderd. Er lääbd elään mid der Ooma, nää, de Bello, em Glaudjuss sei Hund, iss aa noch dòò, unn däär schbringd jedds um se erum unn belld wie verriggd. "Bring misch bei de Auedogder!", saad die Ooma, "däär muss mer helfe. Ach, duud das soo weh!" Vòòrsischdisch fiehrd de Glään se bei de Auedogder. Däär hadd schunn vill Leid geholf, wann se mid eidrische Wääschisser bei ne kumme. Awwer die Ooma hadd kää Wääschisser, däär iss scheins e Migg odder Käwwer ins Au geflòò, unn de Auedogder muss das Viesch erausholle. "Loss dei Ooma hie unn geh enaus schbiele", saad de Dogder dsem Glaudjuss, wie däär sei Ooma aan der Hand erinfiehrd; "isch ruufe disch, wann de se widder abholle kannsch. Awwer bring mer dei Hund nimmeh mid ins Haus! Warrumm haschde ne dann nidd aangebunn?" De Glaudjuss hadd sei Hund noch nie aangebunn, er hadd Angschd, dò kinnderm de Hals dsuuschniere. Bleeder Dogder, denggd er, holld sei Bello uff de Aarm unn gehd middem enaus. Draus lossd er ne gleisch widder laafe, er suuchd e Schdäggsche unn dann schbiele die dswei Schdäggelsches werfe unn abbordiere. Awwer es iss e ungligglischer Daach. Ausgereschend wie se im schännschde Schbiel sinn, kummd de Juschduss, de Doodegrääwer, um die Egg. Oh weh! Vòr demm hannse Manschedde. Däär hadd em Bello Rache geschwòòr, weil de Bello em Juschduss sei Kadds doodgebiss hadd. "Raulischer Keeder!", schreid de Juschduss, schwingd sei Schdogg, rennd uff de Bello dsuu, unn jedds gehd e wildi Dreibjachd loos. De Glaudjuss unn sei Bello renne was gebbschde was haschde, de Juschduss hescheld hinner ne häär, unn im Laafe duud er Schdään raffe unn schmeise. Awwer noch hadd er se nidd ingeholl. Dò heerd de Glaudjuss, dass de Dogder iwwer ne ruufd, er muss die Ooma abholle gehn, dò helfd alles niggs. "Mer misse serigg", saad er dsuu seim Bello, awwer däär iss schunn weidergerennd unn verschwunn. Immer widder heerd de Glaudjuss de Dogder ruufe, immer widder ruufd er selwer laud "Bello, Bello!" Die Ooma schdehd schunn uff der Drebb unn waard. Se hadd e Verband um das ääne Au, unn se muss gefiehrd genn, se därf nidd allään gehn. "Heer doch uff mid dääre Ruuferei", saad se dsem Glaudjuss, "dei Bello wird schunn hemmgelaaf sinn." Awwer nää! Kää Hund! Däär iss furd, unn de Buub heild sisch die Aue ausem Kobb. Ball dsweidausend Jòhr schbääder hannse däär Hund gefunn - bei denne Ausgraawunge in Schwarzenacker. In der Fuusboddemheidsung unnerm Haus vum Auedogder. Unn dòò leid das Sgeledd vum Bello aa heid noch. Wie das aarm Vieh dòò ningeròòd iss? Das hadd sisch schunn mansch ääner gefròòd. Gudd, dass isch das Geheimniss jedds emòò gelifd hann. Edith Braun aus Saarbrücken schreibt Bücher in Mundart und in Schriftdeutsch.

Meistgelesen
Neueste Artikel
Zum Thema
Aus dem Ressort