Am Wochenenn sinn joo widder die Masse gerennt zuume Iewent in der Stadthall. Unn es hadd gehiesch, fier de Urlaub hääde die Leid scheins noch Geld iwwrisch. Unn schunn wääre mer widder bei dem leidische Thema, wo mer im Auwebligg nidd draan vorbeikummt. Awwer das iss joo kää Wunner, wann sich die Veraanschdaldung selwer Börse nennt. Der Begriff hadd graad nidd de beschde Ruf in der Bevelgerung. Weil einische, wo sich uff das aarisch glitschische Parkett getraut hann, schmerzlich hann erfahre misse, dass mer sich fier die scheenschde Wertbabiere nix meh kaafe kann, wann die Babiere nix meh wert sinn. Mer guggd äänfach als ungelernder Geleeschenhääds-Zogger nidd dehinner, wie das alles funktioniert. Die ganz Zeid hannse joo uff Spaare gemacht unn uns gesaad, mir sollde unser Aansprich seriggschrauwe. Also hammir gespart, bis dem arme Sparschwein die Schwaarde gekracht hadd. Pleddslisch werrd widder wehemennt serigggeschraubt. Jedds sinn widder die Spendierbuxe in Mode. Unn wann mer e Haufe greesere Scheine fier e nei Audo logger macht, doo kried mer sogar noch Prämie noogeschmiss. Ich hann seerschd gedenkt, das hääschd Abfrackpämie, weil mer doo de Jubbe auszieht unn die Ärmel hochkrämbelt. Awwer nää, doo steggd das Wort Wrack drin, wo mer sich ball e Knoode in die Zung macht wammers ausschwäddsd. Unn doodemidd duud mer Schiffe bezeichne, wo uff Grund gelaaf unn abgesoff sinn. Das baut em so richdisch uff. In Dengmert sinn se noch nidd uff de Geschmagg kumm. Vielleicht hann die graad all neije Audos. Odder es recht trodds Prämie heegschdens fier e neijes Fahrrad. Awwer doodemidd kammer, wie gesaad, aach prima Urlaub mache: direggd vor unserer Hausdier.