In dem Johr feiert joo die Eisebahn bundesweit e stolzes Jubiläum. Vor genau 175 Johr iss nämlich die Sach midd dem Fortbeweeschungsmiddel ins Rolle kumm. Wann aach noo Dengmerd die erschde Loggomotiefe erscht e bissje spääder gedampft sinn, werrd der Aanlass hie doch entsprechend gefeiert. Wo middlerweile sogar e Indersiddie-Zuuch namens St. Ingbert durch die Geeschend peest. Was die Eisebahn hie in puncto wertschaftlicher Entwigglung fier e Roll gespielt hadd, dass kammer sich heid ball nimmeh vorstelle. Ohne e Schieneverbindung war e Ortschaft ziemlich abgehängt. Irjendwie hadd doomools in der Gründerzeid joo alles unner Dampf gestann. Wahrscheins sinn doo aach so bombasdische Werder wie Infrastruggduur-Maasnahme odder Inweschdizioonszuschüss uffkumm. Unn so monumendaal ware aach die Gebäude. Jeder Bahnhof hadd versucht die annere midd imposande Fassade se iwwertreffe. Die wo bei der Bahn geschaffd hann, hann e Uniform aangehadd und ware als Bahnbeamde richdische Reschbeggdspersone. Was mer heidsedaachs gääre belächele duud. Awwer immerhin sinn die Ziech sellemools noch uff die Minudd pinktlich gefahr. Unn fier Fahrscheine se kaafe, doo iss mer anne Schalder gang. Fier all die, wo so ebbes nimmeh kenne: Der war im Bahnhof ziemlich genau an der Stell woo heid de Audomaad steht. Seits denne gebbd, doo hääscht das Sörwiss. Friejer hadd mer joo sogar noch perseenlich Auskunft kried, wammer heeflisch gefrood hadd. Heid huggd die Auskunft Stigger 500 Kilomeeder weid weg unn iss immer beseddsd. Unn bis dann mool endlich ääner draangeht, wo emm vielleicht weiderhelfe kinnd, doo hadd mer innere Wallunge unn e rooder Kobb kried. Desweeje der Ausdrugg Hottlein.