Am Sunndaach duun se Dengmerder Addmosfääre uff Schallwelle durch de Äther schigge. De Rundfunk will nämlich aus der Stadthall sei Sendung Klingendes Drei-Länderegg leif iwwerdraan. Eichendlich simmir joo, seit Eiropa sesammegewachs iss, geografisch nimmeh in rer Egg-Posozioon unn brauche uns nidd se verschdeggele. Mir leije jedds eejer im Zentrum, awwer mer saad halt noch so. Als Musigg gebbds an dem Oowend lauder Ton-Erzeischnisse aus der Reeschioon. Biosfääre-Kläng sosesaan. Unn das Ganze gudd sordiert unn in verschiedene Geschmaggsrichdunge. Das mache die so, weil sich als schunn Heerer beschwert hann, dass ihr Musigggeschmagg nidd beriggsischdischd werrd. Awwer es gudde alde Dampf-Radio hadds sowieso schun schwäär genuch geeje die Konkurrenz vum Fernsehn, Indernedd unn denne ville Händies. Wo joo heid schunn faschd alles kinne, auser Hemdebischele. Unn jeder kann sich das erauspiekse, was ihm es beschde gefallt, unn wanns noch so ausgefall iss. Also mer kennt joo saan, dass es Geejedääl vun der Vielfalt die Einfalt iss. Unn de Goethe hadd schunn gemennd: Wer vieles bringt wird manchen etwas bringen. Awwer manchmool iss emm die Vielfalt vum Aangebodd schunn zuvill, unn das nidd bloss in de Meedije. Odder bligge Sie doo noch durch, wannse vorme Regalkilomeeder aus 365 verschiedene Joggurd-Sorde stehn? In unserm Nochbarland isses ähnlich. De de Gaulle soll gesaad hann, es wär unmeeschlich, e Land se regiere, wo iwwer 500 Käsesorde hadd. Unn wann ich hundsgewehnlicher Sprudel kaafe will, doo finn ich denne nidd unner dem ganze uffgemoddsde Gliggerwasser. Ball trink ich widder ausem Kraane. Graadselääds!