Is doch scheen. wenn ebbes passd, odder? Auser villeischd die Fauschd uffs Au, wenn se emm selwer treffd. Awwer manschmòò siehn isch im Indernedd Sache, dòò fròò isch misch im Ernschd: Wer kaafd so ebbes? Zu wemm pasd sowas? Die Firme, wo emm mid so Fubbes guddes Geld abluchse wolle, fròòe nidd so zimberlisch. Die behaubde äänfach. Wie die mid der Mail alle paa Daa: „Das passt zu Ihnen, Peter Eckert.“ Dann kummd e langi Lischd:

Die CD gans owwe is längschd kaaf unn váschenkd. Isch soll se awwer wohl jed Wuch nom’mòò kaafe. Immerhin: Gepasd had die jòò mòò– als Geschenk, irjendwie. Awwer was dòò noch alles zu mir passe soll. Z.B.: Kugguggsuhre, Gesundhääds-Amuledde mid magische Edelstään, Gaadeteische, Kaffee-Audomade, Schmusie-Mixer, Dame-Unnerwäsch, elegdrische Fuusfeile, Mehlwirmer, Spròòchkurs Pordugiesisch, Raischerstäbscher, Taucheruhre, Kaschmirschals. Was moderne Mensche eewe brauche. Vòr Jòhre such isch mòò e Buch iwwers Paradies, de Gaade Eden. Seithäär soll isch Heggeschäre kaafe unn Keddesäje unn Düngemittel. Gudd, isch wääs, wie das laafd. Alder, Aanschrifd, Umsadz – plus das, was isch kaafe odder ach bloos aankligge – im Ernschd odder nur so. Was der Computer dòòdraus forr Riggschliss ziehd, kann ach mòò stimme, awwer ofd is es bloos zum Schreie. Wenn’s jòò nur das wär! Awwer es gebbd doch „de groose Bruder“. Geheimdienschde, wo sisch aus all demm un einischem, was se sunschd noch vun mir wisse, aach e Bild vun mir sereschdbossele. Isch schwädze alsmòò unfreindlisch iwwer „die dòò owwe“, sogaa in Radio unn Fernsehn. Isch fahre so, dass misch känn Radaafall váwidschd, unn losse mei Handy  faschd immer aus. Das váschleierd, wo isch misch rumtreiwe. Also nix mid Beweeschungsprofil. Vádäschdisch! Isch gehn in die Kirsch: Ablenggungsmaneewer! Mei Feschdnedz-Telefonade verschlissle isch, indemm isch Pladd schwädze. Vádäschdisch! Isch hann mòò e Buch kaaf „Radikal Gewicht reduzieren!“ Radikal!! Die váschenkd CD waa Fasenaachdsmussig, Tidel „Bombenstimmung“. Dezu das, wo se má Wuch forr Wuch aandrähje wolle: e Selbschdschuss-Dingsbums geje Wihlmais unn Kunschddünger: Dòòdraus mache Fachleid bekanndlisch Sprengstoff. Uiuiui! Hoch vádäschdisch! Ob die misch nidd schunn längschd als Terrorischd fihre? Isch kann nur hoffe. Unn Angschd hann. Das pasd mòò uff jede Fall zu mir.