Mer kann joo berechdischderweis behaupte, dass mir innrer geschichtsträchdisch Geeschend lääwe. Was nix demidd se duun hadd, dass die Leid friejer aangeblich hie all Trachte gedraa hann. Awwer weeje denne hisdoorische Zeichnisse isses joo e sinnvoller Innfall, dass mer jedds Fiehrunge speziell durchs barogge Dengmert organisiert. Wo mir midde uffem Wää vun der Barogg-Stroos leije. Allerdings sinn die Gebeide aus der Zeit in Dengmerd jedds graad nidd so übbisch, wie mer sich das unner dem Begriff Barogg eichendlich vorstelle werrd. Doo hadd unser Nachbarstadt Kaschdel noch meh se biete. Vun dort aus iss joo sellemools Dengmert sogar regiert unn midd Verlaub gesaad e ziemlich gestrietzt worr. Awwer dann iss de barogge Glanz verblasst unn die groos Zeid vum schwarze Gold iss aangebroch. Das war dann nimmeh so vornehm, awwer aach e Blütezeit. Wie das doomols genau war, das kammer heid noch im Rischbachstolle besichdiche. Unn der geheerd sogar zur deitsch Technigg-Stroos. Unn es iss scheen, dass mer die Erinnerung an beides hochhalle. Aach wann die Zeide doomols bestimmt kää Zuggerschlegge ware. Awwer mir hann joo, wanns um die Vergangenhääd geht, aach gudd schwäddse in unsere vollklimaddisierde Eichenheime. Im Priwaadlääwe duud mer joo aach gääre das verkläre, was war. Unn je länger das ganze her iss um so meh.