Seit neijeschdem fahre die Leid joo uff alles ab, wo amtlicherseits bestäädischd worr iss, dasses garandierd nadierlich wär. Seit mir gemerkt hann, dass de scheene neije Fortschridd aach e paar Schaddeseide hadd, dränge mer widder serigg zur Nadduur. So hannse jedds, nur mool als Beispiel in Rentrisch de Rohrbach renadduriert. Scheener isses joo uff jeede Fall, wann so e Gewässer munder durch die Wies pläddscherd als wanns dumpf durch de Beddong rauscht. Unn die Stadt macht sogar Reklame middem Spruch: Natürlich St. Ingbert!Wammer die Leid frood, wie se ihr Lääwensmiddel gääre hädde, doo saanse: ei nadierlich nadierlich. Sie hann halt es Gefiehl, dasse sich ebbes guddes aanduun, wann se zu Sache greife, wo noch im Urzustand sinn. Weil alles wo vorredraan Bio druffsteht, joo sosesaan in e heejeri Sfääre geheerd. Awwer wammers streng holld, iss joo eichendlich faschd alles biologisch. Was so richdische Züünigger sinn, die behaupte sogar, dass Roheel zum Beispiel aach e reines Naduurproduggd wär.Unn fier denne Fall, dass mool de Originalstoff graad knapp iss, gebbds Ersatz, wo middem Fachausdrugg naduuridentisch hääscht. Ich wääs nidd warum, awwer doo falld mir der Spruch vomme beriehmde Filosoof inn: Alles auf der Welt geht natürlich zu, nur meine Hose, die geht natürlich nicht zu. Als direggdes Geejedääl vum Nadierlische gilt joo es Kinschdlische. Was mer allerdings nidd midd kinschdlerisch verwechsle derf. Obwohl ich das aach schunn inn rer Teeaaderuffiehrung erlääbt hann. Doo sinn, woos dunkel worr iss, e paar se spät kumm. Der ään hadd gefrood: Hadds schunn aangefang? Nää, saad der anner, es hadd noch nidd aangefang. Sie schwäddse noch nadierlich.