Dieser Daach hann ich gelääs, dasse fiers Leibniz-Gimmnaasium jedds Gelder logger gemachd hann, fier das groosziechisch se renoviere unn umsebaue. Doo hann ich fier mich gedenkt, doo gebbd mool es Geld sinnvoll inweschdierd, nämlich in die Bildung. Dass de Nachwuchs fier die Aanforderunge vunn der heidisch Zeid fit gemachd werrd. Awwer ich hammir doch e bissje Wehmuud nidd verkneife kinne, wie ich uff dem Bild die alde Schulmeewele gesiehn hann, wo jedds ins Schulmuseum wannere odder uff de Sperrmill. Weil die Museumsstigge, wo ergonomisch nimmeh se verandworde waare, erseddsd werre durch benuddserfreindlicheres Madderiaal. In der Zeid vun Häändi unn SMS hann die alde harde Holzbänk aach ausgedient als Iwwermiddler vun mehr oder weenischer vertraulische Mitteilunge. Was in gewisser Hinsicht schaad iss, weil so Bänk, wo Generaddzioone vun Schieler ihr Sitzflääsch druff abgeweddsd hann, joo aach aussaachekräffdische Doggumennde sinn. Fier de Gemiedszustand vun denne Insasse in der Lehranstalt. Unn aach Beispiele vun sprachlicher Kreatiewietääd unn aangewander Holzschniddserei. Die Kunschdwerke hadd mer nämlich nidd bloos kinne so hinkriddsele. Das war oft richdisch Aarwedd bis mehr sich doo in dem widderspensdische Holz vereewischd gehadd hadd. Das war noch Volkskunschd im urspringlische Sinn unn Gebrauchsgraafigg midd Herzbluud. Heid, wo das joo nimmeh verbodd iss unn uff dem Kunschdstoff aach leicht abgeht, macht das joo sowieso kää richdischer Spass meh. Die Zeid bleibt eewe nidd stehn, nidd emool in der Schuul. Unn sogar wammer gemiedlich beisamme huggd unn die alde Schulzeide uffwärmt unn verklärt werrd Feierzangebowle nur noch selde gedrunk.