Was duud sich das jedds mool auszahle, dass es hie bei uns ball e Duddsend Meeschlichkääde gebbd fier noo Dengmerd ninn se kumme. Doo siehn all die, wo uns hie besuche wolle, glei am Inngang denne stolze Hinweis, dass die Weltorganisazioon graad neilich uns ganz offiziell beschdäädischd hadd, dass mir e Reservaad sinn. Unn quasi unner Naduurschudds stehn. Odder um e bekanndi Schlaachzeil absewannele: mir sinn jedds all biologisch. Also nadierlich nidd bloos die Dengmerder, nää aach all in der ganz Reeschioon drummerum. Unn besunnerschd die in dem Schmuggkäschdche vun Bliesgau. Unn das iss joo ebbes, wo mer werklich stolz druff sinn kann. Ich hann zum Beispiel e Schwooer an der Nordsee, doo war ich immer ganz neidisch uff demm sei Waddemeer. Awwer jedds kann ich dem verzähle, dass mir neierdings naduurschuddsmääsisch in der selb Liga spiele. Vor Begeischderung hann se joo beheerdlicherseids die erfreilich Bootschaffd owwe an die Ortsschilder draangetaggerd. Weil das awwer nidd ganz vorschriftsmääsisch iss, misse se das Ganze jedds widder e bissje diefer hänge. Awwer wie gesaad, das kann schunn mool passiere im erschde Iwwerschwang. Wammer bedenkt, dass sich das midd der Auszeichnung weltweit erumschwäddse duud.