Dass mer spääder noch mool genau noogugge kann, wo mer gewähn war. Fier die Foddos dann direggd ins Indernedd se stelle, das wär awwer kää so guddi Idee. Warnt die Bolizei. Weil nidd jeder e ausschließlich ästeedisches Inderesse an denne Motiefe hadd. Vor allem wann dann noch debei steht, bis wann mer Urlaub macht. Dass die sich scheen e Bild mache kinne, wie lang es Haus noch leer steht. Friejer hadd mer joo aach oft Bauwerke geknippst wie die Eiffelurm odder de schebbe Turm in Pisa. Unn de familiäre Anhang in trauter Eintracht direggd vorredraan. Als Beweisstigg, dass mer aach werklich dort war. De neijeschde Trend iss allerdings, dass mer sei Esse foddografiert. Was sich im Urlaub besunnerschd aanbiede duud, weil das oft ziemlich exoodisch, also garnidd wie Hausmannskoscht aussieht. Allerdings isses dann schwierisch, midd some Foddo se beweise, dass mer das aach werklich gess hadd. Es Au essd joo bekanntlich aach midd. Unn das gebbd dann an de Mund die Meldung durch, es kääm jedds ebbes ganz, ganz Leggeres. Unn er sollt schunn mool es Wasser sesammelaafe losse. In manche Länder iss allerdings es Esse ziemlich werzisch unn scharf. Dass mer e Sunnebrill bräuchd, wammer nur schunn druff guggd. Wammer sich die Urlaubsfoddos dehemm aanguggd, doo kried mer dann Sodbrenne. Odder mer schiebt Kohldamp. Jeenoodemm wies geschmeggd hadd. Unn mer saad sich, was de Saarlänner in dem Fall immer saad: Es war mool ebbes anneres.