Sei Aanwald hädd danne die Kaffee-Buud uff finf Miljoone Dollaar verglaachd. Weil äärschdens: Däär Rand vum Kaffeebescher wäär nidd hooch genungg gewään; gudderschbresch e Fehlkonschdrugdsjoon - machd ääni Miljoon. Dswäddens: De Glääscher hädd nidd demid gereschend, dass däär Kaffee heiß gewään waar, unn hädd sisch dòòdriwwer furschbaar verschrogg. So e Schogg koschd noch emòò e Miljoon - machd dswei. Driddens: Nirjendwoo uff demm Kaffeebescher hädd e Waarnung geschdann, dass mer beirer Vollbremsung kä Kaffee solld dringge. E schwääri Unnerlassung - machd drei Miljoone. Virdens: Die gudd Buggs midde Kaffeeblagge wäär im Äämer. Weils awwer die Lieblingsbuggs vum Glääscher gewään wäär, wäär er awwei aarisch gegnäddschd, allee - vier Miljoone. Finfdens: Dehemm hädd däär aarme Deiwel dann aa noch schwäär Ballaawer mid der Fraa gridd, weil sem de Kaffee soowissoo verbodd gehadd hadd (wääem Hoochdrugg). Deswääe wäär ääs dòòdenòò mimm Milschmann durschgang - machd jeddse im Ganse finf Miljoone. Däär Broddsess hädd de Glääscher haushooch gewunn. Heid gängd er nuur noch Schambuss an seim neie Schwimmingpuul dringge. - Vòòr vier Wuche hadd sisch de Erwien sei gudder Jubbe middem Senf vunnerer Rooschdwurschd versaud gehadd.

Sei Aanwald haddem dringend vunnerer Glaach abgeròòd. Awwer kennsch jò de Erwien: Was die Ammis kinne, kann äär aach. Mennd er - unn glaachd uff e paar dausend Flogge. Jeddse versuuchd sei Aanwald graad, de Erwien aus der Bsischjaadrie rausdseholle.

Evelyn Treib schreibt in Hochdeutsch und Saarbrücker Mundart. Letzte Veröffentlichungen (mit Edith Braun ): "Necknamen und Schimpfnamen saarländischer Orte" und "Keine Fisimatenten".