Aufgepickt · De Kalenner, seminnenschdens der zum Abreisse, werrd jedds aarisch dinn, wies in dem Lied so scheen hääscht. Desweeje gebbds fier die Azwenndszeit e extra Weihnachtskalenner. Wo hinner 24 Diercher allerhand Schnääges verschdeggelt iss. Odder es gebbd sogar zwää Dutzend Säggcher unn annere Behälder wo meeschlichst vill eninngeht. Bei all denne, wo Schoggelaad zu de Grundnahrungsmiddel geheert, iss nadierlich die Versuchung groß. Dasse schunn vorzeidisch doo draangehn unn schnause. Desweeje iss das e guddi Iewung fier Weihnachde, dass mer scheen waard, bisses soweit iss.In Dengmerd gebbds joo sogar e leewensischer Kalenner, wo mer sich jede Oowend irjendwo annerschd trefft unn de Adwend ganz besinnlich feiere duud. So wie das urspringlich joo wahrscheins mool gedacht war.Iwwerhaupt sinn Kalennere am Enn vumm Johr schwäär beliebt. Als klääni Uffmerksamkääd fier treue Kunne zum Beispiel.Als allererschdes guggd mer dort noo, wann im näägschde Johr die Feijerdaache sinn unn rechend sich aus, wievill Brigge-Daache doo so aanfalle. Brigge-Daache - das iss joo so e poetischer, um nidd se saan filosofischer Ausdrugg. Mer siehts fermlich vor sich, wie unner der Brigg de Strom der Zeit entlang fließt.Iwwerhaupt duun sich Kalennere als Geschenke uff de leddschde Drigger prima eichne. Am beschde im Großformaad midd scheene Bilder. Fier Leid wo sunschd schunn alles hann.Apropos Geschenke: doo muss mer uffpasse, dass mer sich bei seine Wunschvorstellunge meeschlichst prääzis ausdrigge duud. Wie das Määde zu seiner Mudder gesaad hadd, es werrd sich zu Weihnachde e Pony winsche. In Ordnung, hadd doo die Mudder gemennd, noo de Feijerdaache gehn mir zum Frisör.