Uff die Spitz getrieb

Mensche wolle hoch enaus, deswää isses schun immer ebbes Besonneres, e Turm se baue. Die wo das kenne, die hann ebbes se saan: frieher de Adel oder die Käärsch, heit die Banke, die Scheichs oder de Trump. De Biewel noo hann se schun in Babel de Giggel kriet unn wollte e Turm baue bis zum Herrgott enuff. Awwer der hat ne e Strich dorch die Rechnung gemacht. Iwwer eemoo hat kenner meh de anner vestann, hinne unn vorne hat's nimmie geklappt, unn der Turm iss nie ferdisch woor - das kenne ma vun ganz viel Projekte joo gut. Unn aa heit geht's oft hoch her, allegar wolle se hoch enaus unn manche treiwe‘s so uff die Spitz, dasses die Heeh iss.

Ich glaab net, dass de Herrgott doomols owwedraus war, wie die aus Babel owwenaus wollte. Dass Mensche sich nimmie vestehn, das schaffe meer ganz alleen. Unn beim Bau vun so ‘me Turm isses aa ganz logisch, dass so ebbes basseere muss. Beim Fundament schaffe all noch uff eener Heeh, siehn sich in die Aue unn bleiwe met de Fieß uffem Boddem. Wann de Turm heeher werd, misse e paar noo owwe, fa se mauere. Die misste normal schwindelfrei sinn - awwer komisch, e bissje Schwindel schad gar nix, wann ma hoch komme will. Dort werd's enger, 's iss immer weenischer Platz, well nur die "owwere Zehdausend" hinbasse. Deswää muss ma die Elleboo insetze, fa net se falle - zur Sicherhäät hat ma oft aa noch enner an de Hand.

Owwe hat ma e besserie Aussicht - unn bessere Aussichte. Ma iwwerblickt alles, iwwersieht awwer aa viel. Die Mensche unne werre ganz kleen, wie Eemetze - kaum noch se siehn, nimmie se heere unn schun gar nimmie se vestehn. Unn irjendwann vegesse die owwe ganz, dass se vun unne denne abhängig sinn. So hann sich irgendwann "die doo owwe" unn die "doo unne" ganz ausenanner gelääbt unn bekeppe gar nimmie, was die annere menne.

Die owwe hann unne e paar Leit, wo se vesorje. Die wolle aa an e heeherie Stell. Deswää gucke se nie serick, nemme also nie Ricksicht. De Wää enuff iss schmal, unn ma kommt uffrecht langsamer voran wie wann ma e Buckel macht. Owwe die sitze gut unn fescht - unn wann ma net uffbasst, krawwelt ma ne leicht in de Hinnere nin. Die wo sich in de Anatomie auskenne, wisse awwer: dann leit ma de Owwere ball uffem Maa unn hängt ne am Enn zum Hals enaus.

Günther Hussong alias "De Plattmacher" wohnt in Kirkel-Neuhäusel und ist Verteter der rheinfränkischen Mundart. Infos über Auftritte und Publikationen unter www.mundart-saar.de .

Meistgelesen
Neueste Artikel
Zum Thema
Aus dem Ressort