Oh Godd Agaade!
Isch kunnd's kaum glawe: Rufd doch die Daache e jungi Fraa: "Oh Godd Agaade". Mir waa das schunn gans ausdenggisch gang. Das soll ebbes ausdrigge zwische wunnere unn váschregge. Nie gehd's um e eschdi Agathe, die ware schunn immer selde wie Thekla. Passierd jemand ebbes Dummes wie stolbere, ebbes hinschmeise odder so, dann rufd má "Hobbla Thekla!" Klòòr is, wie isch jedz rausgefunn hann: Ob Agaade, ob Thekla, das werd, wie's scheind, in gans Deidschland so gesaad.
Wie villeischd ach "Mei lieb Mariesche!!" Das is aus me Lied, wo má‘m aandrohd, má dääd'em sei lingges Bäänsche ausrobbe. Unn das is unser Texdfassung zum Lied "Du kleine Fliege, wenn ich dich kriege", das in -zisch Fassunge iwwerall vòrkummd.
Abropoo "Fliege": Das bringd misch uff de Miggepidd. Der Name is urald, zwischedrin hann se ne ach mòò als Spidzname em Neinkerjer Owwerbirjermeischder Peter Neuber aangehong, weil der Migge stadd Schlibse getraa had. Awwer mein Name Peter had noch meh se biede.
De Flehpidd, der wohl nidd mehr Fleh aan sisch had wie die Leid, wo ne so nenne. Unn dann noch de Blòòspidd. Gesiehn had ne noch känner. Bei uns muss á härhalle, wem'má nidd wääs, wemm má ebbes in die Schuh schiewe kann. Odder má soll ebbes wisse odder mache, will nidd unn weisd de Biddsteller weider: "Fròò de Blòòspidd vun Mòòlschd!" Wobei's in annere Orde de Blòòspidd ach sunschdwo se finne sinn soll.
De Ernschd kummd aach draan. Saad má ebbes, wo demm annere Zweifel kumme, dann fròòd á villeischd: "Is das dei Ernschd?". Unn dann kam'má andworde: "Nää, es is unser Guschdav, awwer er had em Ernschd sei Jubbe aan."
Peter Eckert lebt in Differten.
